А жоспары

Патшалық Ресейдің 1-дүниежүзілік соғысы жоспарының бір түрі. Егер Германия негізгі қарулы күшін Францияға бағыттаса, онда орыс армиясының басты күштерін Аустрия-Мажарстанға қарсы шоғырландыру көзделген. «А» жоспары кейбір өзгертулермен 1914 жылы іске асырылды.

Аустрия-Мажарстанға қарсы негізгі күштерді орналастыру Германия Генштабының 1914 жылғы жоспарын тиімді қолданды. Яғни, Германия өз күштерін Францияға қарсы шоғырландырған жағдайда оның одақтасы әлсізірек Аустрия-Мажарстанға шабуылдау дұрыс шешім болар еді. Оның үстіне, егер орыс армиясы Галицияда жеңіске жетсе, олар Силезияға жетіп, оның өнеркәсібін және бай көмір қорын қоса алар еді.

А жоспарында көптеген кемшіліктер болды. Біріншіден, орыс әскерлері мобилизацияның 14-ші күні шабуылдауға тиіс болды, дегенмен орыс әскерінің жиналу жылдамдығын ескерсек, операция басталар кезде барлық армиясының тек үштен бірі ғана жиналып, оның үстіне тыл қызметтері мүлде дайын болмас еді. Екіншіден, Орыс Генштабы тек Аустрия-Мажарстанға ғана емес, Германияға да қарсы операцияларды жүзеге асыруды көздегендіктен, әскерді бөлу керек болатын. Үшіншіден, Солтүстік-Батыс фронттың армиясының күшеюі де-факто Оңтүстік-Батыс фронт армиясы есебінен болды.