Барий сульфаты

Барий сульфаты - бейорганикалық қосылыс, күкірт қышқылының барий тұзы. Химиялық формуласы - BaSO₄. Табиғатта барит минералы түрінде кездеседі.

Физикалық қасиеттері

Түссіз кристалдық зат. Тығыздығы 4,5 г/сm³, балқу температурасы 1580°С. Суда өте нашар ериді (18°С-да 1 мг/л).

Алынуы

Барийдің тұздарының (хлориді, нитраты), тотығы немесе гидрототығының күкірт қышқылымен немесе оның ерітінділерімен (мысалы, Na₂SO₄) әрекеттескеннің нәтижесінде:

BaCl₂ + H₂SO₄ → BaSO₄↓ + 2HCl

Ba(NO₃)₂ + Na₂SO₄ → BaSO₄↓ + 2NaNO₃

BaO + H₂SO₄ → BaSO₄↓ + H₂O

Химиялық қасиеттері

Қойылтылған күкірт қышқылымен әрекеттескенде, нашар еритін барий сульфаты жақсы еритін барий гидросульфатына айналады:

BaSO₄ + H₂SO₄ → Ba(HSO₄)₂

1600 °C температурада ыдырайды:

2BaSO₄ → 2BaO + 2SO₂ + O₂

Қолдануы

Барий сульфаты литопон ақ бояуын алуда, қағаз, резеңке, керамика өндірістерінде ауырлатқыш ретінде, рентген сәулелерін сіңіргіш келетіндіктен, медицинада ішек-қарын жолдарын зерттеуге қолданады.

Аналитикалық химияда барий сульфатын сульфат-ионын және барий ионының гравиметриялық анализінде қолданады.

Тағы қараңыз

Барий қосылыстары