Роджер Бэкон (ағылш. Roger Bacon; 1214 ж.ш., Илчестер, ағылш. Ilchester, Сомерсет графтігі, Англия — 1292 ж.ш., Оксфорд, Англия; Ғажап доктор (лат. Doctor Mirabilis атымен белгілі) — орта ғасырлардағы ағылшын ойшылы, жаңа заман тәжірибелік ғылымының ізашары, қала қолөнершілері топтарының идеологы.
Өмірбаяны
Феодалдық әдет-ғұрыптарды, идеология мен саясатты әшкереледі. Өзінің көзқарасы үшін Бэкон 1277 жылы Оксфорд университетінде сабақ беруден шеттетіліп, шіркеудің бұйрығы бойынша монастырь түрмесіне жабылды.
Ғылыми еңбектері
Бэконның дүниетанымы дәйексіз болғанмен онда алдыңғы қатарлы ғылыми пікірлер де көп. Схоластикалық жаттандылық пен беделдерге көз жұма табынуды айыптай келіп, ол табиғатты тәжірибе жүзінде зерттеуге, дербес зерттеу жұмыстарын жүргізуге және ғылымды жаңартып отыруға шақырды. Тәжірибе мен математикаға негізделген таным өдісін жақтады. Ғылымның мақсаты деп Бэкон адамның табиғат алдындағы құдіретін күшейтуді есептеді. Оның еңбектерінде алхимиялық, астрологиялық және сиқыршылық көзқарастардың орын алуына қарамастан, Бэкон бірқатар батыл ғылыми және техникалық болжамдар айтты.