Латыш тілі (латышша latviešu valoda) — Үндіеуропа шоғырының балтық тілдері тобына жатады.
Лексикалық құрамы жағынан литван тіліне жақын, морфологиялық тұрғыдан қопармалы (флективті) тіл. Латыш тілі орта латыш, ливон, жоғарғы латыш диалектілеріне бөлінеді, әдеби тілі орта латыш диалектісі негізінде қалыптасқан. Латыш әліпбиінде 33 әріп бар, фонема саны — 50; 12 дауысты, 28 дауыссыз, 10 дифтонг дыбыстан тұрады. Дауыс екпіні сөздің бірінші буынына түседі, соңғы буындағы созылыңқы дауыстылар қысқарып айтылады да, қысқа дауыстылар мүлдем түсіп қалады. Латыш тілі неміс тілінің әсеріне ұшыраған. 1922 жылдан готикалық жазу орнына латын әліпбиі енгізілді. 1988 жылдан Латвия Республикасының мемлекеттік тілі, 2004 жылдан Еуропалық Одақтың ресми тілдерінің бірі.
Латвияда ана тілі ретінде сөйлеушілерінің саны 1,39 миллион, шетелдерде шамамен 110 000.