Тасбас балығы

Тасбас балығы (Gobio gobio) - тұқы тұқымдасына жататын балық.

Тұрқы әдетте 15 см-ге дейін, кейде 22 см-ге дейін жетеді. Түсі жасыл қоңыр, бүйірі ақшыл, көгілдір не қара дақты, кейде бұл дақтары тұтасып, қара жолақты көрінеді. Арқа, құйрық қанаттары теңбілді, басқасы сұрғылт.

Тасбас ағысы күшті емес, түбі құмды не ұсақ тасты өзендерді мекендейді. Жемі - бентос, көктемде басқа балық уылдырығын да жейді. Үлкен үйір құрып, өмір сүреді. Жыныстық жағынан 3-4 жылда жетіледі, уылдырығын (3000) су түбіне шашады.