Говард Хоукс

Говард Хоукс
ағылш. Howard Hawks
Говард Хоукс
Жалпы мағлұмат
Туған кездегі есімі	Говард Винчестер Хоукс
Туған күні	30 мамыр 1896 (1896-05-30)
Туған жері	Гошен, Индиана
Қайтыс болған күні	26 желтоқсан 1977 (1977-12-26)(81 жас)
Қайтыс болған жері	Палм-Спрингс, Калифорния, АҚШ
Азаматтығы	АҚШ
Мамандығы	режиссёр сценарийші кинопродюсер
Білімі	Корнелл университеті
Белсенді жылдары	1916 — 1970
Марапаттары	«Құрметті Оскар» (1975) — кинодағы ерекше еңбегі үшін
IMDb	ID 0001328
Ортаққордағы Говард Хоукс

Говард Винчестер Хоукс (ағылш. Howard Winchester Hawks; 30 мамыр 1896, Гошен, Индиана — 26 желтоқсан 1977, Палм-Спрингс, Калифорния, АҚШ) — америкалық кинорежиссёр, сценарийші және кинопродюсер. Киносыншы Леонард Малтин оны «есімі көпшілікке таныс болмаса да, ең ұлы америкалық режиссер» деп атаған. Ал Роджер Эберт Хоуксты «таза кино түсірудің хас шебері және авторлық кино сыншыларының кумирі» деп сипаттады, өйткені ол сан алуан жанрдағы туындыларында өзіне тән байсалды құндылықтарды қалыптастыра білді. Ол «Сержант Йорк» (1941) фильмі үшін «Үздік режиссер» номинациясы бойынша Оскар сыйлығына ұсынылып, 1974 жылы киноөнерге қосқан үлесі үшін Құрметті Оскар сыйлығын иеленді.

Хоукс — комедия, драма, гангстерлік фильмдер, ғылыми фантастика, нуар, соғыс фильмдері мен вестерн сияқты көптеген жанрларды меңгерген әмбебап режиссер. Оның фильмдеріндегі өр мінезді, өткір тілді әйел бейнелері кейіннен кино тарихында «Хоукстық әйел» деген терминнің қалыптасуына негіз болды.

Хоукстың шығармашылығы Мартин Скорсезе, Роберт Олтмен, Джон Карпентер, Райнер Вернер Фасбиндер, Квентин Тарантино және Майкл Манн сияқты режиссерлерге зор ықпал етті. Entertainment Weekly журналы Хоуксты ең ұлы режиссерлер тізімінде төртінші орынға қойып, былай деп жазды:

«Оның қолтаңбасы визуалдылықтан бұрын тақырыптық тереңдігімен ерекшеленеді: ерлердің айнымас серті, сол ерлердің аптығын басатын әйелдер бейнесі, паңдыққа деген жиіркеніш және астарлы әзілге деген құштарлық. Оның вестерндері мен драмаларында, мюзиклдері мен комедияларында нағыз кәсіби маманның еркіндігі сезіледі. Француздардың оған неліктен тамсанғаны түсінікті: оның қарапайымдылыққа бүккен тереңдігі — студиялық жүйенің ең үздік жарнамасы болды».

Ал атақты француз режиссері Жан-Люк Годар оны «барлық америкалық өнерпаздардың ішіндегі ең ұлысы» деп бағалаған.