Майкл Чимино

Майкл Чимино
ағылш. Michael Cimino
Жалпы мағлұмат
Туған кездегі есімі	Майкл Антонио Чимино
Туған күні	22 ақпан 1944 (1944-02-22)
Туған жері	Нью-Йорк, АҚШ
Қайтыс болған күні	26 сәуір 2017 (2017-04-26)(73 жас)
Қайтыс болған жері	Лос Анжелес, Калифорния, АҚШ
Азаматтығы	АҚШ
Мамандығы	режиссёр сценарийші кинопродюсер
Белсенді жылдары	1973 — 2007
Марапаттары	«Оскар» (1979 — екі мәрте) «Алтын глобус» (1979)
IMDb	ID 0001047
Ортаққордағы Майкл Чимино

Майкл Антонио Чимино (ағылш. Michael Antonio Cimino; 22 ақпан 1944(19440222), Нью-Йорк, АҚШ — 26 сәуір 2017, Лос Анжелес, АҚШ) — америкалық кинорежиссёр, сценарийші және кинопродюсер. «Бұғы аңшысы» (The Deer Hunter) фильмі үшін Үздік режиссер номинациясы бойынша «Оскар» лауреаты (1979).

1939 жылы 3 ақпанда (кейбір деректер бойынша 1943 жылы 16 қарашада) Нью-Йоркте италоамерикалықтар отбасында дүниеге келген. Йель университетін тәмамдағаннан кейін тележарнама саласында еңбек етті. Кинематографтағы жолын сценарий жазудан бастады (Дуглас Трамбуллдың «Үнсіз жүгіріс» атты фантастикалық таспасы). Оның алғашқы елеулі жұмысы — Клинт Иствуд басты рөлді сомдаған «Тандерболт мен Лайтфут» (1974) фильмі болды.

Арада төрт жыл өткенде Чимино Вьетнам соғысы туралы «Бұғы аңшысы» картинасын түсіріп, бұл туынды оның шығармашылығындағы ең үлкен жетістікке айналды. Фильмде Мерил Стрип, Роберт Де Ниро және Кристофер Уокен сияқты танымал актерлер ойнады. «Бұғы аңшысы» бес «Оскар» жүлдесін (соның ішінде «Үздік фильм» және «Үздік режиссура» номинацияларын) иеленді. Осы табыстан кейін United Artists компаниясы Чиминоға келесі жобасын бастауға үлкен қаржылық мүмкіндік берді, осылайша режиссер «Жәннат қақпасы» (1981) вестернінің түсіріліміне кірісті. Алайда, сол заман үшін өте қомақты саналған 40 миллион доллар бюджеті бар бұл фильм прокатта оңбай сәтсіздікке ұшырады. Бұл жағдай United Artists студиясының банкротқа ұшырауына әкеп соқты, ал Чиминоның өзіне «Ең нашар режиссура» үшін «Алтын таңқурай» сыйлығын алып келді. Тек 30 жыл өткеннен кейін, фильмнің режиссерлік нұсқасы көрсетілген соң ғана туынды сыншылар мен көрермендердің жоғары бағасына ие болды. Қазіргі уақытта бұл фильмнің кезіндегі сәтсіздігі «кинематограф тарихындағы ең үлкен әділетсіздіктердің бірі» ретінде қарастырылады.

1980-жылдары режиссер екі экшн-фильм түсірді. Олар: Микки Рурк басты рөлді сомдаған, оң пікірлер жинап, бірқатар номинацияларға ие болған «Айдаһар жылы» (1985) және Марио Пьюзоның романы желісімен түсіріліп, Кристофер Ламберт ойнаған «Сицилиялық» (1987) фильмдері.

1990 жылы Уильям Уайлердің аттас фильмінің римейкі — «Үрей сағаттары» жарық көрді. Бұл таспада Микки Рурк (бұл жолы «Алтын таңқурай» номинациясын алды) пен Энтони Хопкинс төбе көрсетті.

1996 жылы режиссер «Күн аулаушы» атты өткір сюжетті драманы таспалады.

2007 жылы Чиминоның «Аударма қажет емес» атты қысқаметражды туындысы «Әркімнің өз киносы бар» атты киноальманахтың құрамына енді.

Режиссер 2016 жылы 2 шілдеде 78 жасқа қараған шағында өз үйінде, жақындарының қоршауында өмірден озды.